Navigation:

Suche

Suche

Plattdeutsch & Politik

Bericht von Angela Hillen und Anne Schrader, unsere beiden Plattdeutschbeauftragten für den Landkreis,
am 6.10.2015 im Kreistag
:

Geachte Landraat Herr Harings,                                                        
geachte Froonslüüd,                                                                                                  
geachte Mannslüüd,

siet 2009 hett de Landkreis Ollnborg een Plattdüütschen Frünnenkreis. 2010 sünd Detmar Dirks un ik, Angela Hillen, dorut as „Beopdragte för de Nedderdüütsche Spraak“ beropen wurrn. 2013 hett dat enen Wessel gewen. Fro Anne Schrader hett för Herrn Dirks dat Amt öwernohmen. So kummt dat nu, dat wi hier staht un enen Bericht öwer de Plattdüütsche Arbeit in´n Landkreis aflewern drööft.
Wi droopt us dree bit veermol in´t Johr un af un an ok nochmal in een lüttje Runn.
Lüttje Runn, dat bedüüt man bloots mit de Gemeenbeopdragten. Dat nu jedeen Gemeen or de Stadt Wildshusen een Plattdüütschbeopdragten hett, dat is een Wark vun den Frünnenkreis. Weet Se, wer dat in ehr Gemeen is? Wenn jo, denn is dat een godet Teken. Wenn nich, köönt Se dat op de Homepage vun usen Landkreis nakieken. Nich in jedeen Gemeen erfohrt de Beopdragten dat sülvige Unnerstütten, dor sünd Se denn villicht nochmol fraagt. In Wildshusen hett dat just een Wessel gewen. Man Herr Friedrich Ahlers un Fro Annegret Arkenberg sünd so vull vun Elan, de schüllt dat woll wuppen un sik duchtig inbringen.
Bi so een Drapen geiht dat um dat Uttuuschen vun Ideen un Erfohrungen. De een hett gode Künstler to sehn kregen, de anner hett mol een plattdüütsche Wienproov mitmaakt. Se glööwt gor nich, wat dor alln´s op´n Disch kummt. Un Se weet: „Konkurrenz belebt das Geschäft“! Dat kann doch för us Opgaav bloots vun Vördeel ween.
Kiekt wi achter us:
• wi hebbt för de Kinner Lääswettstriets hart, de noch nienich so goot annohmen wurrn sünd (Video-Bidrääg köönt Se op de Homepage ankieken)
• wi hebbt all Bökereen in Landkreis befroogt, wat dat Angebot angeiht un of een Bedarp an Ünnerstütten dor is, dorto hett de Landkreis Bökerkisten, de Scholen un Kinnergoorns utlehn köönt
• för de Kinner un Jugendlichen hett dat een Theoterpprojekt gewen, wobi veel Kinner bi dat Schauspeleern hangen blewen sünd
• bi de Scholen hett (endlich) de Lannesschoolbehörde ehrn Opdrag eernst nohmen un mit Fro Maike Sönksen un Fro Andrea Cordes engagierte Fachberotersche installeert
• för us Sitzungen kunnen wi meisttiets een kompetenten Referenten inlaarn, so as to´n Bispill Dr. Reinhard Goltz vun dat Institut för Nedderdüütsch ut Bremen or Stefan Meyer vun de Ollnborgische Landschupp
• wi hebbt bi den Kreisollernraat vörspraken un kloor maakt, dat al Schöler een Recht op Plattdüütsch in Unnerricht hebbt, dorto gifft dat een Erlass. Dat sülvige schall bi den Kreisschölerraat ok noch maakt weern
• op´n goden Padd sünd de Scholen, de all een Obmann/-fro för Platt hebbt, so hett man enen direkten Anspreekpartner un dat Material landt nich foors in´ne Tunn
• all twee Johr droopt wi us nich in´t Kreishuus, sünners in een vun de Gemenen. So weern wi all in Dötlingen un in Wildshusen un hebt us vun een plattdüütsche Gästeführerin den Oort wiesen laten

An disse Steer willt wi enen ganz hartlichen Dank de Gemeenbeopdragten tokomen laten, denn Se sünd dejenigen vör Oort, de veel ehrenamtliche Arbeit leisten doot!
Man ebenso grootardig is dat Unnerstütten vun´t Kreishuus. Wi köönt hier in den Saal nebenan tohoop komen. Us dücht, dat is för de Deelnehmer een Wertschätzen un dat hett so ok een „Gewichtigkeit“, anners as wenn man sik in jichenseen Kneipensaal dropen deit. Groden Dank geiht dor besünners an Angela Ceranka hier in´t Kreishuus, de de Inladen wieterleit, jümmers een open Ohr hett, ehr egen Ideen inbringen deit un dat, nu gaht oppassen, as Hochdüütsche!
Man wi seggt jümmers: Man kann auch auf Hochdeutsch etwas für das Plattdeutsche tun! Dorto fallt mi us eersdet Drapen mit usen neden Landraat, Herrn Harings in.
Wo dat in de Tokunft wietergahn schall, dat vertellt Se nu miene Kollegin
Anne Schrader.

Velen Dank!

Ik segg mol so’n beten wat dorto, wat wi noch an „Visionen“ hevt, wat wi us noch wünschen doot:
Wie wörn ton Bispill dat Plattdüütsche gern ehn beten neger an die „Nee’n Technologien“ ranbringen. Wi kunn us ehn plattdüütschet Geocaching vörstelln, wat vielliecht de Schoolen oder uk de Gästeführer in de Gemeenden utprobeern kunnen.
Dat wer uk fein, wenn de regionolen Zeitungen af un to ehn Artikel in ehr Blatt un uk ONLINE, nich blots op Hochdüütsch sünnern uk fors op Plattdüütsch dorto rinsetten den.
Bit Rodio für junge Lüü hevt wi uk all mool ankloppt, over de wulln noch nix von us weten. Over wi gevt noch nich op!
Junge Lüüd för Plattdüütsch „klortomoken“ is us ganz wichdig, un dor kunn Ideen to de „Nee’n Technologien“ vielliecht hölpen.
Uk sind us nee‘e un uk junge Gesichter bi us Dreepen hier in Kreishus ummer willkoomen. Wenn Se dor mol wenn unner de Fööt kummt, ummer to us schicken, bidde.
Denn dat is jo so:
Över Platt wat ummer mehr snackt, over Platt wat leider ummer weniger snackt.

In’e Schoolen holt wi us mittlerwiele ehn beten tröch, weil wie intwischen twe düchtige Beopdrogte von de Landesschoolbehörde hevt un uk de Gemeendebeoptrogten sik veel dorom kümmert.
Bi de Ferienpässe in de enkelnden Gemeenden kunn man viellicht noch mehr Plattdüütsch unnerbringen.
Bispill: Wi kookt oder backt op Platt oder sowat, vielliecht uk ehn plattdüütschen Dag met Oma un Opa.
Ehn anner Wunsch is uk, dat in all Rothüüser een Plattschapp installeert wat. Wi harrn vör ehn poor Weken ehn „Vörstellungsgespräch“ bi Herrn Harings un he weer von us Idee fors innahmen. Dorto mochen wi noch  de „Chefs von de Gemeendebeopdrogten“, nämlich de Börgermeesters in’t Boot holen.
An Herrn Harings nochmal besten Dank, dat se us so fründlich un hartlik empfungen hevt un us ehre Unnerstützung för us Arbeit toseggt hevt.
Demnächst hevt wi ehn Drepen met de Plattdüütschbeopdrogten von Land Ollnburg in Ganderkesee, organiseert von de Ollnborger Landschoop. Dar sünd wi all gespannt op, mol kieken wat de annern so makt un sük uttuschen. „Netzwarke“ opbohn, dat is uk för Plattdüütsch wichtig.
Wi freut us über de Veranstaltungen un de Aktivitäten de de Gemeendebeopdrogten in de enkelnden Gemeenden op’n Patt brogt hevt un unnerstützt se dorbie giern.
Wi freut us, dat eenige Gemeenden in ehre Kulturveranstaltungen tominst meist all ehn plattdüütsch Saak dorbi hevt.
Ehn annere Idee is noch, plättdüütsche Musikveranstaltungen in de Gemeenden to bringen.
So ehn Art: Lütt Wacken op’n Placken
Dorto brukt wi allerdings de Unnerstützung un denn Willen von de Gemeenden un wi mööt uk noch utklamüstern, wi dat met de Finanzierung utsieht. Un - givt bi de Lüü överhaupt Interesse för sowat, vör allen bi de jungen Lüü?
2009 wern de Opgoven für us Plattdüütschbeoptrogden noch een groden un kahlen Acker, nu wast dor all Hofer, Weten, Roggen, - denn Mais loot ik mol wech….- - un wi denkt, dor sünd noch eenige Ecken free to‘ beplanten.
Wi seggt  - Besten Dank fört Tohörn un för ehre Hülpe in de vergangen Johr un in Tokunft.
Angela Hillen       Anne Schrader